「基本法」! 各位讀者,唔駛瞓住。純粹溫馨提示,基本法第五條話:「香港不實行社 會主義制度和政策,保持原有的資本主義制度和生活方式,五十年不變。」即係, 2046就係香港人嘅大限。

政治真會開玩笑。

2046,仲有成三十年,就算我未打柴都半死啦,話知佢。點知打開報紙,睇見嗰個喺 銅鑼灣開書店嘅李波,同埋四個股東、店長,陸陸續續喺大陸、泰國以及香港失蹤,李 波仲要聽哂梁振英枝笛,失蹤完自己走番出嚟提供資料,仲話書店「做了一些事情的確 不應該做的」,所以甘願以「自己的方式」偷渡返內地。呢啲情節,真係連奧斯卡金像 大編劇都諗唔Q到。唷,搞乜香港咁快就行到呢個地步呀。

「孫公,你想移⺠、退休?」

玩嘢咩,我由第一日返工開始,每朝爬起身嘅時候,都重複、認真地諗藉口退休㗎啦, 尤其呢排成鬼日落雨!老細,你咁問,叫我點答好呢?

「咁你呢?」

做咗律師咁耐,我學到最有用嘅嘢,就係遇到啲難答嘅問題時,用反問形式,問番轉 頭,攞番個主動。

例如我太太曾經問過我:「你地啲律師係咪好爛滾㗎?」我就曲線咁回答:「點解你地 會咁覺得呢?」仲扮到好理直氣壯,等佢唔好意思追問落去。

大大份外籍老細回答:「Well…. If 香港冇得撈,我同家人就返英國囉。」 佢唔係河國榮,呢個答案,正常不過。

咁我呢?我生成一個中國人樣喎。根據大陸所詮釋嘅基本法同中華人⺠共和國國籍法, 我一定屬於「首先是一名中國公⺠」呢個類別啦。加上,中國外交部講過大約一萬次呢 個無敵語句:「這個問題純屬中國內政,中國政府堅決反對任何國家進行任何形式的干 涉。」我嘅問題,似乎外國幫唔到手。

同老母傾計(糟糕!叫「母親大人」先至政治正確嘛)。佢感嘆話:「唉!我地上一代 人就話走難落嚟香港啫,估唔到去到你呢代,都仲要走難。」我聽到佢老人家咁講,都 眼泛淚光。

老實講,如果一心諗住撇sss,唔駛搞咁多嘢啦。就係因為「同熱愛這片土地」,先至 的起心肝,對不公不義之事發聲。一間書店,做得出啲乜嘢,之不過係出版同售賣講領 導人情史嘅內地政治禁書。咁都唔得,香港仲成乜嘢世界?

問心,你願意日日睇要攞批文,政治正確嘅膠戲嗎?你願意日日睇中央台新聞,領導人 出巡,解放軍救災,人大政協兩會嗎?你願意日日睇大公、文匯送飯嗎?你願意,唔係 你自己選擇唔玩,而係冇得你玩 Facebook、IG (Instagram) 嗎?你願意見到吳亮星呢類 廢人繼續掌權、立法嗎?你願意見到政府高官個個好似吳克儉咁,剩係識翹二郎腿、黑 面,以涼薄見稱,擦鞋上位嗎?

就算你係現實主義者(即係,唔係鍾意咁樣,不過…. 又點同大陸鬥啫),你願意輪到你 自己出事時,你仔女打咗毒疫苗時,你嘅家園被剷平你要申訴時,你比人打到豬頭,話 你唔維穩,而你嘅律師就因為維權而被禁錮嗎?

其實,香港人根本只剩得一條出路,就係堅定維護香港嘅自由、法治,原有嘅制度同生 活方式。你有眼見啦,就算你係普通人一個,唔駛等到2046,大陸已經會隨時走上 門,用佢自己嘅方式夾走你。

年輕人可能唔知,有五十九年歷史嘅亞洲電視,係全球首間華語電視台,真係曾經光輝 過。不過1997後,大量大陸商家入主,節目、新聞質素都每況愈下,近年更加被王征 玩殘、玩謝。如果香港人唔想香港好似亞視咁熄機,仲要熄機熄得咁難睇,「噗」一聲 冇咗,我地真係要打醒十二分精神。

最起碼,登記做選⺠先啦:http://www.voterregistration.gov.hk/chi/home.htm。 再一次溫馨提示,一定要喺5月2日或之前登記做選⺠,或者更新選⺠登記資料,先至趕得切喺9月4日舉行嘅立法會選舉投票。

香港 係為時未晚嘅!咁香港人,即刻做嘢喇喂! (撰文:孫公公@法政匯思)(圖片來源:網上圖片)

所有博客及專欄文章只代表作者本人意見,並不代表本報立場。

(原文載於 2016 年 4 月 14 日《852郵報》)