「巴拿馬文件」曝光,朋友問我:「你哋呢班律師,走法律罅幫權貴洗錢同逃稅果陣,唔覺得有問題咩?我哋小市民唔識法律就要守規矩交稅,班權貴就利用你哋呢啲知識分子洗錢同逃稅!好唔公平啫!」又,一向愛國愛黨嘅老爸問我:「又話民主可以改善管治、令政府更透明開放、令從政者對人民更負責?你睇,根據巴拿馬文件,英國、冰島、臺灣呢啲所謂民主嘅地方,都有政要牽涉隱瞞資産!分分鐘可能有貪污添!有口話人冇口話自己!憑咩話民主一定好?憑咩話中國會腐敗係因爲冇民主?」

David Tang 早前一篇題為「民主選舉係萬能 正如醫生必要能醫百病?」嘅網誌已俐落 KO老爸嘅邏輯,而且都適用於同民主制度一樣,既非完美亦非萬能但絕對不能缺少嘅法治制度。

作為一個意義 L,我仲有補充。即係咁,社會上嘅制度,包括政治、司法、傳媒、教育、宗教、家庭等,都係人搞出嚟嘅。而搞啲咁嘅嘢,其中一個重點就係為咗令社會更好。何謂更好?獨裁者可能覺得佢自己可以從心所欲就為之好、教主可能覺得人人都對信仰虔誠就為之好。而我同好多人就相信,人人公平、平等就為之好。其實,根本朋友同爸爸同我一樣,追求公平同平等囉。佢哋覺得嬲,係因為佢哋覺得而家嘅法律制度同「所謂民主」嘅外國勢力對中國嘅批評唔公平。之但係民主同法治制度嘅精神,exact_ly就源自係公平同平等!嘈咩啫!

當然,民主同法治制度不是完美亦不是萬能,但呢個可以話係操作問題。雖知道體制嘅另一個重點,就係對內裡嘅人指派唔同嘅角色及相應嘅權責,呢個特性可以話係源自於對個人能力及人性弱點嘅不信任。換句話講,體制本身可以話就係建基於不完美。

而家個世界好似好混亂,咁到底我哋要質疑嘅,係對公平同平等嘅追求、係民主同法治制度嘅存在、係制度嘅設計、定係操作制度嘅人?如果認同追求公平、平等呢個大原則,我暫時未諗到有咩制度比一人一票嘅民主制度同法律面前人人平等嘅法治制度更恰當。咁即係可能係制度嘅設計同操作制度嘅人出咗事?香港嚟講,民主同法治制度嘅設計同啲人出咗咩問題?又可以點改善?作為地球同香港社會嘅一份子,我哋又可以點樣出一分力?

歡迎大家同我一齊攝高枕頭反思。By the way,喺今年9月嘅選舉中投票,分分鐘就係各位出一分力嘅機會!記得喺5 月2日或之前,登記做選民或更新選民登記資料呀!

(撰文:Stephanie Matias @ 法政匯思)(圖片來源:panamapapers.icij.org、ICIJ YouTube影片截圖)

所有博客及專欄文章只代表作者本人意見,並不代表本報立場。

(原文載於 2016 年 4 月 7 日《852郵報》)