「連 Selina 都離婚了。我好難過。」姊妹 Alexa 說。情緒化嘅佢又嚟料,「人哋離婚關你鬼事咩?我知,你同你個 ex 都係拍咗成九年拖都有共過患難但最後都係分手丫嘛!但都過咗去啦,come on!」Alexa 呷一口 gin and tonic,出咗竅,慢慢說:「如果冇分手,今日係我哋拍拖13週年紀念日。」我反眼。

「喂CY 話喺你心愛嘅中環海濱起泳棚喎,到時成個維港都係面堅尼大媽,有人話要用反蒙面法先可以對付佢哋!」我努力引 Alexa 笑。佢冇反應,沉醉喺自己嘅世界,不能自拔。「喂原來亞視可以做到四月一日喎!喂愚人節嚟嘅?!」

Alexa 終於開口:「其實我都明白點解亞視有啲元老級員工唔走。就好似同一個人耐咗,明知段關係有問題,但又好似不停有希望,加上已經太耐未試過單身,唯有自欺欺人地相信事情有轉機。怕改變。怕承認過去多年的錯誤。怕面對改變後的未知。」

好在 Alexa 最後同 Selina 一樣,勇敢分手,雖然過程好痛苦,但而家嘅佢,脫胎換骨。「你記得嗎,你啱啱分手果陣一日到黑煩住我,一飲咗酒就猛話人類社會需要結構性改變,一夫一妻制係唔 work 嘅,又喊住咁四圍叫人數臭你,等你可以變得更好喎!果陣我有諗過玩你,叫你去整容!」我笑佢。

Alexa:「我真心覺得阿 ex 雖然係衰,但就算唔係佢,換成另外一個男人,如果冇徹底認清根源問題同對症下藥,悲劇只會不斷重演喺我身上。」世事都被佢看透了。呢個 theory 完全係萬能 key。 

CY 固然係__,但就算唔係佢,如果冇結構性嘅改變,另外一個又係由小圈子選出嘅特首,咪又係主要只識擦鞋、內交同搞政治就可以上位!中環泳棚呢種可悲嘅笑話,亦只會不斷重演。而家其實大家都知,香港社會、中國甚至成個地球都有問題架,睇下幾時爆啫。咁到底CY、香港政府、香港人、中國政府、國際社會甚至整個人類又有冇面對自己根源問題同對症下藥、作出改變嘅智慧、勇氣同決心?

(撰文:Stephanie Matias@法政匯思)(圖片來源:規劃署、亞視及任家萱 Selina之fb)

所有博客及專欄文章只代表作者本人意見,並不代表本報立場。

(原文載於 2016 年 3 月 11 日《852郵報》)