成日聽到人講做律師好陰騭(音:質)(我驚太深,有立法局議員或者只係學簡體字嘅唔識),我自己入咗呢行十年,其實我一尐(音:D)都唔覺。

我哋做嘅,就只係讓大家都知道法律上有嘅權利,同埋去幫人維護呢尐權利。點樣喺合法嘅情況下去幫當事人爭取最大嘅利益,就係每日都要做嘅工作。

好多人話,總知幫犯法嘅人就唔啱,呢個我完全唔同意。首先,就係有一個最基本嘅法 律概念,叫做無罪推定,即係話所有人喺未被判有罪之前,都應該係當無罪嘅,無人可 以單憑自己嘅睇法就話人有罪!所以即使前特首被落案,有冇貪真係要判過至知;又或 者呀朱Sir,連案都未落就更加唔駛講。

另外呢,就係每個人都有佢法律上嘅權利。所以鍾意魚蛋加茅台嘅有,疑似喺暗角打人 嘅有,開書店嘅都應該有(但係唔知點解佢好似冇)。而呢尐權利,就應該由我地一班 受過專業訓練嘅人仕去話俾佢地知。

始終,法律面前,應該人人平等,無話邊個可以超然邊個。所以,幫犯咗法嘅人,其實 唔應該係唔啱嘅事。而且,君不見最近成日有俾人告佔中襲警嘅案件,上到庭審完先知 好多都係無中生有,如果個個犯咗法都唔俾搵律師,咁就真係死得冤枉多囉。

我覺得只要係盡力幫搵我地幫手嘅人,人哋點睇根本唔駛理。我哋又唔係官,都唔駛做 到表面上係市⺠嘅官,但係實際上係唔會維護市⺠利益,淨係諗阿頭點睇自己。

即係如果有幾十個關乎大眾利益嘅case要做,我地都唔介意取消攞咗嘅假期去做埋佢, 但係老闆係都要做咗呃人多二百幾億去買架Thomas火車嗰個case先,等佢可以邀功, 咁樣無視其他case嘅大眾利益,你話點怪人覺得我哋陰騭啫!

同埋我哋學嘅做嘅,就係以理服人。我要贏一單case,唔係靠人脈,係靠理據。只要係 有充份理由,怕咩拉布拖長個case喎?係啱嘅,咪一五一十解釋清楚囉!只係懂得轉移 視線,話對家用唔同嘅手段阻住,又唔反思自己嘅理據有幾爛,點可以服人,點可以贏 單case呀!你估真係一味靠嚇個官話唔俾錢尐人就無錢開飯就會贏咩!

所以我成日話如果律師會個統一執業試可以令所有行家都係以理服人,唔駛再見尐大大 聲喺論壇話射殺暴徒係正確呀,又或者拉大隊同律政司司長見面叫呀司長加控罪名呀咁 嘅行家,我第一個雪地祼身跪地讚成!始終我覺得我哋唔係呀邊個,無啦啦見律政司司 長,同去警署門口拉橫額話支持警隊其實無分別,係有間房坐囉。

所以我真係唔明點解我哋用心為當事人爭取權益,又不停要以理服人嘅工作,都會比人 話陰騭無陰公,睇嚟我地都真係要同初二嗰個本宇宙最溫和暴動(應該係,除非唔係) 嘅前線醫護人員一樣默默耕耘(到依家都無人讚過佢地,唔知有幾多個醫護員 on call 要留喺醫院過初二),堅守我哋嘅法治精神!

(撰文:荒唐鏡@法政匯思)(圖片來源:《警察故事1》劇照)

所有博客及專欄文章只代表作者本人意見,並不代表本報立場。

(原文載於 2016 年 2 月 18 日《852郵報》)